Joan den legegintzaldian Hondakin Planean aurreikusitako azpiegiturak geldiarazteko hartutako erabakiak GHKn eragindako defizita dela-eta, % 20 igo behar izan da orain arte zaborren tratamendurako aplikatu den tarifa, eta materia organikoaren gaikako bilketa bultzatzeko diru-laguntzak murriztu behar izan dira.

Debabarrena Eskualdeko Mankomunitateko eta Badesako langileen ordezkariekin sinatutako akordioen berri ematen da:

Debabarreneko Mankomunitateko gaikako bilketaren portzentajeek hobetzen jarraitzen dute eta % 39,66 izatera iritsi dira; izan ere, 2014an lortutako datua (% 35,77) baino portzentajezko ia lau puntu gorago daude. Emaitza hoberenak Eibar (% 43,23), Elgoibar (% 43,28) eta Mallabia (% 44,27) udalerrietan lortu dira, Gipuzkoako gaikako bilketaren batez bestekoa gainditzen baita hiru udalerri horietan (%42,3) eta 2020. urterako derrigorrean bete behar den helburu gisa Europak ezartzen duen % 50etik zazpi puntu baino gutxiagora baitaude.

Funtsean, gaikako bilketa hobetzeko eta birziklatze-tasak handitzeko inbertsio eta zerbitzuak areagotu izanak eragin du tasa igo beharra. 2020rako Europar Batasunak alor horretan ezarritako helburuak gainditzea da helburua. Zehazki, 2017rako honako hobekuntza hauek aurreikusi dira: batetik, txipdun edukiontzi grisa ezartzea, eta, bestetik, papera eta kartoiaren eta ontzien bilketen maiztasuna handitzea.

Debak eta Mutrikuk ere materia organikoaren gaikako bilketa egingo dute, eta birziklatu ezin diren hondakinetarako edukiontzi grisa izango duten Mankomunitateko lehen udalerriak izango dira. Edukiontzi gris hori Mankomunitate osoan ezarriko da 2017. urtean.

Debabarreneko Mankomunitateak 13.026.184 €-ko aurrekontua onartu du 2017. urterako. Ahalegin ekonomiko nagusia hiri-hondakinen gaikako bilketara eta kudeaketara bideratutako partidetan ikusten da, partida horien zenbatekoa 8.679.673 € baita, guztizkoaren ia bi heren.